Viska og gleði

Kraftar náttúrunnar í blómum

Blómadropar eru í raun og veru kraftar náttúrunnar í vökvaformi með tíðni þess blóms sem í vökvanum er. Það er mjög einfalt að búa til blómadropa en til þess þarf smá þolinmæði og vilja. Kraftar blóma geta hjálpað okkur í lífinu ef við kjósum að njóta þeirra með þessum hætti.

Það var Edward Bach sem uppgötvaði að blóm gætu haft áhrif á líðan fólks. Hann var læknir sem tók eftir því að mismunandi blómavökvi hafði áhrif á mismunandi tilfinningar sem skjólstæðingar hans voru að takast á við. Það var upphafið af gerð blómadropa og eru þeir núna seldir um allan heim í flöskum sem eru merktar "Bach flower essence."

Á sama hátt getum við tekið inn í orkulíkama okkar tíðni og virkni blóma með því að setjast í nálægð þeirra í náttúrunni eða í garðinum. Þegar það er gert þá kemur einnig til áhrifa lita, ilms og návist blómadífanna auk tíðni blómanna á orkusvið okkar.

Ef vilji er til að gera blómadropa þá þarf hreint vatn, glerskál eða krukku, hugleiðslu og smá þolinmæði á meðan vatnið er að taka við tíðni blómsins. Áður en blómið er slitið upp er gott að byrja að tengja sig við náttúruna og það blóm sem á að týna til þess að fá að vita hvaða blóm er tilbúið til þess að gefa okkur tíðnina sína. Þegar leyfið er fengið er hægt að setjast í nálægð þess og byrja að klippa blómgaða hlutann af og setja hann í vatnið í skálinni. Knúparnir liggja í vatninu í ákveðin tíma og á meðan er hægt að sitja í þögn og hugleiða hvað blómið muni hjálpa okkur með. Stundum þurfum við ekki einu sinni að fara út í náttúruna það er hægt að gera blómadropa í garðinum heima ef við höfum t.d. aspartré, morgunfrú, graslauk eða önnur tré eða jurtir sem vaxa í garðinum.

Það er talað um að gera blómadropablöndu þegar sólin skín en þar sem það er mjög bjart hér á landi og oft fáir sólardagar þá er það ekkert skilyrði. Það er aftur á móti ágætt ef það er sól, sérstaklega ef við tökum ca. 3 klst. í að hugleiða á blómið á meðan tíðni þess skili sér í vatnið. Þegar blómavökvinn er tilbúin þá er hann settur á glerflöskur (ekki plast) og síðan er hann þynntur út með meira vatni, því meiri þynning, því meiri virkni samkvæmt smáskammtafræðinni. Til þess að blómavatnið geymist sem best er sett smá eðalkoníak út í vatnið en það virkar eins og rotvarnarefni, þannig er hægt að geyma dropa í mörg ár.

Það getur verið skemmtilegt að gera blómadropa þar sem það tengir mann ennþá betur við náttúruna og þá tíðni sem hvert blóm gefur. Gott er að hafa í huga virðingu við náttúruna og slíta ekki óþarfa mikið af blómum upp. Það þarf ekki nema nokkra knúpa til að búa til góða blöndu.

Blómadropar hafa verið notaðir með góðum árangri frá því að Bach uppgötvaði þá fyrst í kringum 1930 þó að ég geti ímyndað mér að þeir hafi verið notaðir frá örófi alda. Áhrif þeirra var þó ekki markvisst rannsökuð á seinni tímum fyrir er Edward Bach gerði það og gerði virkni þeirra síðan opinbera og upp úr því fóru þeir að verða til sem markaðsvara. Við þekkjum það auðvitað að blómaknúpar hafa verið notaðir í te og þannig hefur tíðnin og virkni þeirra fært fólki ákveðna lækningu. Ef blóm eru þurrkuð og drukkin sem te þá er ekki sama tíðnin í því og við blómavatnið. Tíðnin í blómavatninu er viðkvæm þannig að það þarf að passa að setja ekki puttana ofan í vatnið eða láta neitt vera í snertingu við það nema að það sé alveg hreint.

Það hafa verið unnar 38 blómadropategundir í Bach Flower blómadropunum og hver tegund vinnur á mismunandi sviðum. T.d. vinnur Öspin á ótta sem á sér engar skýringar, ótta sem engin ástæða virðist vera fyrir.

Eikin er fyrir fólk sem stendur uppi sama hvað á dynur og gefst ekki upp fyrr en það hreinlega dettur niður örmagna. Þetta er fyrir þá sem hafa nagandi samviskubit ef þeir verða veikir af því að aðrir reiða sig á þá.

Mimulus /apablóm er hægt að taka inn þegar fólk veit ástæðuna fyrir óttanum. Ef það er til dæmis ótti við að tala á fundum, koma fram á opinberum vettvangi, ótti við það sem leynist í myrkrinu, ótti við dýr eða að fara í flug og þess háttar.

Vervain getur verið gott að taka inn þegar fólk hefur mjög stífar skoðanir og reynir með sannfæringar krafti sínum fá aðra á sömu skoðun, þeir sömu geta átt erfitt með að hlusta á sjónarmið annarra og eru oft undir miklu álagi og streitu þar sem þeir eiga erfitt með að gefa eftir og slaka á. Þessir blómadropar eru mjög góðir fyrir börn sem eiga erfitt með að slaka á, þurfa að vera stöðugt á ferðinni, droparnir hjálpa þeim að kyrra hugann og að róa sig niður.

Það eru til svokallaðir áfalladropar í Bach blómadropasettinu en þá er fimm tegundum blandað saman í eina flösku, í áfalladropunum er bæði til sprey og krem, hvoru tveggja má nota útvortis, en dropana má bæði taka inn og bera beint á sig. Það er líka hægt að búa til sína eigin blöndu í spreyi ef einhver á nokkrar tegundir af blómadropum.

Það eru líka til áfalladropar í íslensku blómadropunum, ásamt fleiri tegundum. Áfalla dropar geta verið góðir ef fólk lendir í aftanákeyrslu þá er gott að bera Lífsbjörgina á svæðið sem hefur orðið fyrir hnjaski og taka hana jafnframt inn á nokkurra mínútna fresti. Þetta á við um hvaða áföll sem er Lífsbjörgin hentar í öllum þeim tilfellum sem fólk lendir í áfalli, með því að taka hana inn er verið að losa áfallið úr orkunni. Lífsbjörgin getur hjálpað til þegar manneskja, eða dýr er í taugaáfalli, eða sjokki. Það er hægt að nota blómadropana á ýmsan hátt, það er hægt að taka nokkra dropa beint í munninn undir tunguna, það er hægt að setja nokkra dropa í vatn, ávaxtasafa, eða te og drekka þá þannig, það deyfir líka bragðið af koníakinu að setja þá útí annan vökva. Þá er hægt að láta dropana falla beint á líkamann þar sem fólk finnur til verkja eða eymslum svo sem í baki, hálsi, liðum eða við beinbrot eða tognun eða við annars konar líkamleg einkenni svo sem eftir fall eða byltu. Það er hægt að búa til bakstra og setja á viðkomandi svæði, það er líka hægt að setja dropana í krem og olíur og bera þá þannig á svæði sem þurfa á meðferð að halda.

Það geta allir haft gagn af blómadropum, bæði börn og fullorðnir og það er alveg sama hvernig ástand manneskjunnar er, þeir hafa til dæmis engin áhrif á lyf eða annað sem er verið að taka inn. Það er auðvitað mjög einfalt að prófa hversu vel þeir virka ef fólk er með líkamleg einkenni einhversstaðar til dæmis ef fólk er með eitlabólgu í hálsi þá er mjög gott að nudda þeim á hálsinn. Ef það eru verki í baki þá er gott að setja dropa þar sem verkurinn er. Jafnvel slæman höfuðverk er hægt að laga með því að láta nokkra dropa t.d. "áfalladropana í Bach Flower" falla beint ofan á höfuðið í stað þess að taka verkjalyf. Það er hægt að setja dropana út í baðvatnið ef maður vill baða sig upp úr orkunni þeirra en það þarf ekki nema nokkra dropa út í vatnið kannski 1- 5 dropa.

Það er hægt að gefa dýrum blómadropa, en dýrin eru mjög næm á þessa orku og droparnir eru mjög fljótir að hafa áhrif á þau. Það er hægt að gefa öllum dýrum þessa dropa það má setja þá í vatn og draga það upp í sprautur og sprauta þannig upp í dýrin en svo er líka hægt að gefa þeim beint í vatnið. Þá er ekkert betra að gefa marga dropa heldur en fáa 3, 5 eða 7 dropar er fínt.

Ég hef prófað margskonar blómadropa og er yfirleitt mjög ánægð með virkni þeirra. Hver tegund hefur sína tíðni og sérsvið en þeir eru líka misjafnir að upplagi.

Ef fólki langar að efla skynfærin og innsæið þá er gaman að finna hvernig hver tegund blóma er að virka á orkuna og lesa síðan eftir á hvernig aðrir hafa upplifað virkni blómsins. Þegar þið farið að skoða og lesa ykkur til um dropana þá munið þið eflaust sjá að nánast hver einasta tegund getur passað fyrir ykkur. Það er hægt að kaupa Bach Flower dropana á netinu. Þá er hægt að fara til blómadropa meðferðar aðila og fá þá til að blanda dropa fyrir sig og vinna um leið markvisst með ákveðnar tilfinningar.

Ég býð m.a. upp á blómadropa meðferð og blöndun á dropum bæði með íslenskum dropum og Bach Flower þar sem ég er lærður blómadropa meðferðaraðili.

S. 615 5710

Efst á síðu

Ýmislegt

Heim