Viska og gleði

Umskipti sálarinnar II

Neðangreint bréf er þýtt upp úr 8. kafla bókarinnar Telos 2. hefti eftir Aurelia Louise Jones.

Elsku systir frá Lemúríu,

þetta er bróðir þinn og vinur, Adama. Það er ánægja mín að hafa samband við þig í dag, frá hjarta til hjarta. Þegar ég opna hjarta mitt fyrir þér, þá bið ég þig einnig að opna hjarta þitt fyrir mér, að æðsta sannleika tilverunnar.

Ég finn fyrir djúpum sársauka þínum og sorginni vegna missis ástkærs sonar þíns. Það eru mjög eðlileg viðbrögð móðurhjartans að syrgja barnið sitt. Það er mikilvægt mín kæra að þú leyfir þér að upplifa sársaukann og sorgina; það er hvorki líkamlega né andlega heilbrigt að bæla þessar tilfinningar eða afneita þeim. Þegar tíminn er réttur og þú ert tilbúin, verður jafn mikilvægt að sleppa tökunum á sársaukanum og taka gleðina aftur inn í líf þitt. Lífið verður að halda áfram hjá öllum, því það er eilíft.

Þú ert með fallegt opið hjarta kæra systir og sársaukinn vegna missis elskulegs sonar þíns er þáttur í að aðstoða hjarta þitt að opnast ennþá meira. Þú veist það elskuleg, að það er ekkert til sem heitir dauði. Það er blekking þriðju víddarinnar. Ef þú gætir litið handan fortjaldsins myndir þú sjá að sonur þinn er lifandi, hann hefur það gott og er meðvitaðri en nokkru sinni fyrr.

Hann er nú betur í stakk búinn til að skilja tilfinningar sínar til þín en í líkamlegri tjáningu og hann hefur nú fengið leyfi til þess að koma nær þér og hjarta þínu en hann gat nokkurn tímann í jarðlífinu. Hann er nú að fullu meðvitaður um þá miklu og sönnu ást sem þú barst til hans og hjarta hans er miklu opnara. Hann áttar sig líka á því að hann endurgalt ekki þá ást eins og hann hefði getað, eins og þú vonaðist til. Þetta er hvatning fyrir hann hérna megin blæjunnar til þess að skoða það gaumgæfilega hvaða lexíur hann vill læra í næstu endurfæðingu.

Þú hefur átt þúsundir lífa á þessari plánetu vegna þróunar þinnar og þú hefur eignast þúsundir barna. Þú hefur endurfæðst með mjög mörgum þeirra aftur og í raun hefur þú aldrei verið lengi aðskilin frá þeim sem þú hafðir sterkar hjartatengingar við. Sonur þinn hefur verið hluti af lífi þínu mörgum sinnum og hann verður það aftur, sérstaklega þegar hulan á milli víddanna þynnist. Á næstu árum munu hulurnar lyftast alveg og þið munið sjá ástvini ykkar aftur augliti til auglitis. Það er ekki svo langt þangað til, þar sem þið hafið tekið ákvörðun um að uppljómast, þá munið þið upplifa mikla gleði þegar þið komið saman aftur með öllum ykkar ástvinum, ástvinum sem þið hafið orðið viðskila við í jarðlífinu. Þið fáið að vera með þeim aftur og þið finnið áþreifanlega fyrir þeim án þess að þurfa að yfirgefa líkamann. Getur þú ímyndað þér þá uppákomu og alsælu sem þessir stórkostlegu endurfundir munu skapa! Það er hluti af áætluninni, vinkona mín. Haldið í kærleikskertið og vonarlogann.

Finndu nálægð sonar þíns núna. Hann sendir þér djúpa ást og hlýju. Frá því að hann fór yfir í andlega heiminn hefur hann öðlast nýja þekkingu sem hann skorti á meðan hann var í jarðnesku lífi. Hann hefur beðið karmaráð ljóssins um leyfi til þess að fá að vera nálægt þér og að vera einn af leiðbeinendum þínum sem aðstoða þig í næstu þroskaskrefum.

Ég, Adama, bið þig um að láta af þeirri tilfinningu að þetta hafi verið harmleikur. Hvað viðkemur syni þínum, slysið sem hann upplifði var til þess að vinna að áætlun, hvað sem svo sýndist hið ytra. Maðurinn sem keyrði á hann var hluti af uppgjöri á karmísku samkomulagi. Þú mátt vita að ef ekki hefði komið til ákvörðunar sonar þíns á innri sviðum um að enda jarðvistina og fara yfir á næsta svið þá hefði aldrei orðið neitt slys. Í raun og veru þá var ekkert slys, heldur var þetta útfærsla á þeim þroska verkefnum sem sálirnar höfðu tekið ákvörðun um.

Framhald.....